| Dunyodagi eng yirik onlayn-qidiruv tizimi – Google endi ijtimoiy o‘yinlarni ishlab chiqarish bilan ham shug‘ullanadigan ko‘rinadi. Bunday fikrga kelishimizga asos sifatida kompaniya saytida berilgan bo‘sh ish o‘rni haqidagi e’lonni olishimiz kifoya. E’longa ko‘ra, sinovdan muvaffaqiyatli o‘tgan nomzod Google kompaniyasining yangi biznesi – ijtimoiy o‘yinlarni rivojlantirish imkoniyatiga ega bo‘ladi, deya yozilgan.
Ishga qabul qilingan xodim, eng avvalo, mahsulotni yo‘lga qo‘yish bo‘yicha rejalar ishlab chiqishi, uni joriy etish uslublarini aniqlashda yordam berishi hamda ishlab chiqish bosqichlarini takomillashtirishi lozim. Nomzodga qo‘yiladigan talablar – texnik savodxonlik, tadbirkorlik sohasidagi tajriba hamda o‘yin platformalarini chuqur anglab yetgan holda tahlil va miqdoriy tahlil sohasida kuchli tomonlarga ega bo‘lish va boshqalar.
Yangi xodim HTML5 bazasidagi brauzer platformasida o‘yinlarni ishlab chiqadimi yoki Android mobil peratsion tizimidagi o‘yin loyihalarini boshqaradimi, bu hali noma’lum. Yangi ishga olingan menejer Google bosh ofisiga – Kaliforniya shtati, Mauntin-Vyu (Mountain View) shahriga ko‘chib o‘tadi.
Eslatib o‘tamiz, Google 2010-yil may oyida o‘zining Chrome brauzeri foydalanuvchilari uchun o‘yinlar sotiladigan onlayn-do‘konni ishga tushirgan edi. Oradan bir yil o‘tib, Chrome Web Store do‘konidan afsonaviy Angry Birds o‘yining HTML5-versiyasi paydo bo‘ldi. Bundan tashqari, Google o‘tgan yili mashhur FarmVille ca CityVille o‘yinlarini ishlab chiqaruvchi Zynga kompaniyasiga ham 100-200 million dollar atrofida invetsitsiya kiritgan edi.
| |
