| Shu yilning 22-mart kuni reliz qilingan Firefox 4 brauzeri Internet foydalanuvchilarining orasida undan sal avvalroq, ya’ni 14-mart kuni to‘liq versiyasi taqdim qilingan Internet Explorer 9 brauzeriga qaraganda uch marta ko‘proq qiziqish uyg‘otdi. Mozilla Foundation jamg‘armasining rasmiy blogida keltirilishicha, 24 soat ichida yangi Firefox 4 brauzeri 7,1 million marta ko‘chirib olingan. Aksincha, Microsoft korporatsiyasi tomonidan ishlab chiqilgan IE9 brauzeri esa bir sutka ichida 2,3 million marta ko‘chirib olingan.
Mozilla korporatsiyasining bosh direktori Geri Kovach o‘zining blogida shunday yozadi: "Firefox 4 oldingilariga qaraganda yanada ko‘zga tashlanib turadi, u "brauzer” so‘ziga yangicha ta’rif berdi”. "Endi u shunchaki veb-sahifalarni ko‘rish uchun mo‘ljallangan dastur emas, balki u o‘zimizning onlayn hayotimizni o‘taydigan, xavfsiz axborot almashiladigan muhitdir”.
Firefox 4 brauzerining ishlash tezligi ancha oshgan, interfeys zamonaviy ko‘rinishga keltirilgan hamda u eng so‘nggi veb-standartlarni to‘laligicha qo‘llab-quvvatlaydi. Brauzer Windows XP, Windows Vista, Windows 7, Linux va Mac OS X operatsion tizimlarida ishlaydi. Bu borada ham "olovrang tulki” IE9 ustidan "g‘alabaga” erishgan, chunki IE9 hozircha faqatgina Windows Vista va Windows 7 operatsion tizimlarida ishlaydi xolos.
| |